ꪋꪳ꫁ ꪬꪣꪸ ꪭꪒꪲ ꪅꪮꪉ ꪅ꫁ꪽ ꪋ꪿ꪽ ꪄꪮꪉ ꪹꪋ꫁ ꫛ  ꪹꪊ꫁ꪱ

ꪵꪝꪉ ꪭꪱ ꪼꪒ꫁ ꪣ꪿ꪺꪙ ꪤ꫁ꪮꪙ ꪡꪉꪰ ꪑ꫁ꪱꪀ ꪁꪫꪱꪣ ꪼꪔ

ꪑꪱ ꪩꪣꪳ ꪎꪸ ꪁꪫꪱꪣ ꪄꪚꪾ ꪼꪕ ꪎ꪿ꪺꪙ ꪹꪎꪉ ꪋꪱꪒ ꪹꪓꪷꪥ ꪋꪽꪸ ꪀꪴ꫁

ꪋꪴ꫁ ꪵꪀ꪿ꪫꪉ ꪶꪀ꫁ꪙ ꪒꪒꪲ ꪑ꫁ꪱꪥ ꪼꪐ꫁ ꪹꪎꪸ꪿ꪀ ꪀꪺꪉ ꪹꪭꪙ

ꪑꪱ ꪩꪣꪳ ꪎꪸ ꪄ꪿ꪺꪉ ꪵꪏ ꪄꪾ꪿ ꪵꪄꪙ ꪁꪱꪒ ꪫꪮꪉ ꪹꪀꪱ ꪀ꫁ꪺ

ꪹꪄ꫁ꪱ ꪀ꪿ꪫꪱꪙ ꪢ꫁ꪺ ꪄꪚꪾ ꪭ꫁ꪮꪉ ꪶꪯ꪿ ꪹꪁꪸ꪿ ꪁꪷ ꪄꪮꪉ

ꪑꪱ ꪩꪣꪳ ꪎꪸ ꪎꪉꪸ ꪶꪀ꪿ꪉ ꪁ꫁ꪮꪉ ꪎꪉꪸ ꪣꪷ ꪹꪔꪸꪣ ꪶꪠ꫁ꪉ

ꪨ꫁ꪱ ꪙ꪿ꪉꪴ ꪠ꫁ꪱꪥ ꪹꪜꪸꪙ ꪋ꫁ꪽ ꪜꪀꪲ ꪀꪸ

ꪑꪱ ꪩꪣꪳ ꪎꪸ ꪜꪸ ꪒꪾ ꪙꪙꪲ ꪵꪎ꪿ꪫ ꪶꪎꪙ ꪬ꪿ꪙꪴ ꪩꪱꪥ ꪵꪣꪉ ꪹꪚ꫁

ꪑꪱ ꪩꪣꪳ ꪎꪸ ꪠꪙꪳ ꪹꪎ꫁ ꪀ꫁ꪮꪣ ꪭꪒꪰ ꪹꪙ꫁ ꪵꪮꪫ ꪀ꪿ꪫꪲ ꪵꪣꪉ ꪜꪷ

ꪵꪝꪉ ꪭꪱ ꪼꪒ꫁ ꪙ꪿ꪉꪰ ꪶꪁ꫁ ꪝꪱꪙ ꪀꪙꪲ ꪘꪷ꪿ ꪎꪺꪒ

ꪑꪱ ꪩꪣꪳ ꪎꪸ ꪖ꫁ꪺꪥ ꪠꪀꪰ ꪋꪚꪴ ꪄꪉꪲ ꪬꪮꪣ

ꪑꪱ ꪩꪣꪳ ꪎꪸ ꪏꪮꪣ ꪠꪀꪰ ꪵꪁ ꪠꪀꪰ ꪵꪔꪉ ꪼꪭ꪿ ꪩ꫁ꪮꪉ

ꪑꪱ ꪩꪣꪳ ꪎꪸ ꪹꪀ꫁ꪱ ꪩ꪿ꪱꪣ ꪋ꫁ꪮꪉ ꪑꪱꪣ ꪹꪄ꫁ꪱ ꪎꪴ꪿ ꪠꪺ

ꪵꪝꪉ ꪚꪲ ꪬꪺ ꪹꪮꪷ꪿ꪥ ꪹꪬꪷꪥ ꪤꪴ꪿ ꪹꪭꪙ ꪨꪱꪥ ꪖ꫁ꪱꪙ

ꪑꪱ ꪩꪣꪳ ꪎꪸ ꪬ꫁ꪮꪉ ꪹꪭꪙ ꪭ꫁ꪱꪙ ꪹꪄꪱ ꪀꪒꪴ ꪩꪱꪥ ꪚꪺ

ꪮꪺꪙ ꪹꪜꪸꪙ ꪨꪲ ꪨ꪿ꪺꪙ ꪀꪱꪥ ꪹꪮꪸ꪿ ꪹꪣꪉ ꪨꪱꪥ ꪀꪾ꫁

ꪑꪱ ꪬꪱꪀ ꪎ꫁ꪽ ꪩꪣꪳ ꪩ꫁ꪺꪥ ꪎꪸ ꪢꪴ꪿ ꪁꪮꪙ ꪊꪉꪸ ꪹꪭꪱ ꪹꪙꪷ

ꪵꪝꪉ ꪭ꫁ꪮꪀ ꪭꪙꪸ ꪬꪱꪀ ꪖꪀꪳ ꪻꪊ ꪚ꪿ꪮꪉ ꪶꪣꪙ ꪠꪉꪸ ꪀ꫁ꪫꪱꪉ

ꪑꪱ ꪩꪣꪳ ꪎꪸ ꪮ꫁ꪙꪲ ꪔꪷ꪿ ꪵꪩ꫁ ꪕꪚꪾ ꪎ꪿ꪱꪉ ꪨꪺꪉ ꪣꪷ

ꪣ꪿ꪉꪲ ꪵꪝꪉ ꪖꪲ ꪘꪷ ꪁꪫꪱꪣ ꪬ꪿ꪱꪙ ꪵꪮꪉ ꪙꪮꪀ ꪹꪣꪉ ꪹꪠꪉ ꪡ꫁ꪱ

ꪑꪱ ꪩꪣꪳ ꪎꪸ ꪁꪫꪱꪣ ꪵꪣ꪿ ꪨ꫁ꪱ ꪜꪽ ꪼꪫ꫁ ꪵꪙꪫ ꪹꪩꪒ ꪠꪉꪴ ꫛ ꪹꪭꪱ ꪹꪙꪷ

ꪠ꫁ꪮꪙ ꪁꪫꪱꪣ ꪹꪩꪉ ꪪꪽ ꪶꪕ꫁ – ꪙꪾ꫁ ꪣ꪿ꪱ ꪜꪲ 2005

Tác giả: Lường Văn Tộ – Sông Mã 2005

Topics #dan toc thai #truyen thong dan toc thai